Ekonomia -
LAN GATAZKA
Renferen asteazkeneko lanuzteak aldirietako zerbitzuan izango du eragina, EAEn
Lanuzteak 12:00etatik 16:00etara eta 20:00etatik 00:00etara egingo dituzte. Gutxieneko zerbitzuak % 75ekoak izango dira puntako orduetan.
AGENTZIAK | ERREDAKZIOA
CGT sindikatuak asteazken honetarako Renfen deitutako lanuzteak aldirietako zerbitzuan izango du eragina Euskal Autonomia Erkidegoan (EAE).
Espainiako Sustapen Ministerioak % 75eko gutxieneko zerbitzuak ezarri ditu puntako orduetan eta % 50ekoak, ostera, gainerako orduetan.
Renferen webgunean ikusgai dagoen gutxieneko zerbitzuen dekretuen arabera, distantzia erdiko eta luzeko trenak normaltasunez arituko dira.
Renfeko iturriek Europa Press albiste agentziari jakinarazi diotenez, grebak aurreikusitakoa baino eragin txikiagoa izango du Bizkaian eta Gipuzkoan, San Ignazio eguna izaki, jaieguna delako.
Biharkoaz gain, beste hiru lanuzte daude deituta: abuztuaren 14an eta 30ean eta irailaren 1ean, 12:00etatik 16:00etara eta 20:00etatik 00:00etara.
