Ekonomia -
LAN-ESKAINTZA PUBLIKOAK
Abian da EAEko administrazio publikoko lan´-poltsak kudeatzeko atari berria
Gaur egun, 57.000 pertsona daude EAEko Administrazio Orokorreko, Justizia Administrazioko eta Segurtasuneko 163 lan-poltsatan izena emanda.
EITB.EUS
Gaurtik aurrera martxan da EAEko administrazio publikoko lan-poltsekin lotutako izapideak egiteko atari berria. Aurrerantzean, 163 lan-poltsatan izena emanda dauden 57.000 pertsona horiek beren lan-eskaintzak eguneko 24 orduetan, urteko 365 egunetan eta edozein gailutatik kudeatu ahal izango dituzte.
Atari berria gaur egun EAEko Administrazio Orokorrean (EAO-Lakua), Justizia Administrazioan eta Segurtasunean (ez Ertzaintza) dauden 163 lan-poltsekin jarri da martxan.
Guztira, 57.000 pertsona daude 163 lan-poltsa horietan izena emanda: 27.515 pertsona, Euskadiko Administrazio Orokorreko 114 lan-poltsatan; 20.599 pertsona, Justizia Administrazioko 4 lan-poltsatan, eta 8.445 pertsona, Segurtasun Saileko 45 lan-poltsatan.
Andrés Zearreta Eusko Jaurlaritzako Funtzio Publikoko sailburuordearen esanetan, "gaur urrats oso handia eman dugu administrazioa herritarrengana hurbiltzeko. Prozesuak eta izapideak sinplifikatuko ditugu, eskuragarriago egiteko, eta, horrela, administrazioaren eta herritarren arteko harreman digitalerako bide ematen dugu".
Atari berrian sartzeko, enplegu-eskatzaileak bere identitatea egiaztatu beharko du IZENPE Autentifikazioaren eta Ziurtapenaren Euskal Sozietateak herritarren esku jartzen duen ziurtagiri digitalaren sistemaren bitartez.