Euskal arrantzaleek berdel gehiago arrantzatu ahal izango dute aurten

Espainiako Nekazaritza, Arrantza eta Elikadura Ministerioak 2,3 milioi kilo berdel gehiago harrapatzeko aukera emango die Kantauriko eta ipar-mendebaldeko itsasontziei, 2019rako ezarritako kuotaren jaitsierari aurre egiteko.

Ministerioak ohar bidez jakinarazi duenez, kantitate gehigarri horri esker arrantza aukerak % 11,64 igoko dira, neurri batean, Europatik ezarritako jaitsiera konpentsatzeko.

Laster, kala eta ontzi bakoitzari dagozkion kantitateak jakinaraziko dizkio Ministerioak sektoreari.

Abenduan, Europar Batasuneko Arrantza ministroek 2019rako arrantza kuotak adostu zituzten eta berdelarena % 20 gutxitu zuten.

Jaitsiera horren ondorioz, Espainiak 20.277.500 kilo harrapatzeko baimena zuen, behin gehiegizko arrantzagatik (2009. urtea) ezarritako isuna kenduta.

Kuota jaitsieraren aurrean, Espainiak negoziazioak abiatu zituen Europar Batasuneko beste herrialde batzuekin, kuotak elkar trukatu eta era horretan berdel gehiago harrapatzeko aukera izateko.