Asteko bosgarren greba eguna gaur, Gipuzkoako zahar-egoitzetan

ELA sindikatuak deituta, Gipuzkoako zahar-egoitzetako, eguneko zentroetako eta zaintzapeko pisuetan aste honetako bosgarren greba eguna dute gaur. Sindikatuak salatu duenez, lan-hitzarmenaren negoziazioa "ez atzera ez aurrera" dago, eta azken bi asteetan "ez da aurrerapausorik" egon mahai sektorialean.

Aurretik ere lau greba egun izan dituzte langileok irailean eta urrian (ikasturtea hasi zenetik, beraz, bederatzigarren greba eguna da honakoa). Abenduan beste zortzi lanuzte daude iragarrita (hilaren 24, 25, 26, 27, 28, 29, 30 eta 31n).

Protesta ekitaldi ugari egin dituzte beharginok asteon: autoen karabana, elkarretaratzeak, "pintxo-pote aldarrikatzaileak"... Gaur, kontzentrazioa egingo dute Gipuzkoako Foru Aldundiak Donostian duen egoitzaren aurrean, eta ondoren, manifestazioan abiatuko dira Gipuzkoa plazatik (11:30).

 

 

ELA, kontu eske, patronalari eta Aldundiari

Sindikatu abertzaleak Adegi, Garen, Lares eta Matia 2020 patronalen jarrera salatu du: "2017 eta 2018 urteetarako soldatak izoztea proposatzen dute oraindik, eta ez dute negoziorik onartzen". Gipuzkoako Foru Aldundia ere kritikatu du ELAK, "zerbitzuaren zuzeneko ardura du, baina ez du jarrerarik hartu".

ELAk duela bi urte egin zuen beharginen lan baldintzen inguruko proposamena, horren aurrean, "patronalaren jarrera denbora pasatzen uztea" izan dela salatu du. "Azken mahai sektorialaren bileran proposamen eskasa egin ziguten", erantsi du.

Sindikatuaren esanetan, "argi dugu zeintzuk diren gure gutxienekoak: 2017-2018 urteetarako soldata igoera adostea, eta lan-hitzarmena betearaztea".

ELAk nabarmendu duenez, "lan-gatazka honen erdigunean emakumezko sektore baten duintasuna dago. Oraindik ere bide luzea dago egiteko gizonezkoen eta emakumezkoen arteko soldata arrakala desager dadin".

"Bide horretan, erakunde publikoak aitzindari izan behar dira. Ekiteko unea dute. Bien bitartean, borrokan jarraituko dugu zaintza-lanen garrantzia azpimarratzen", erantsi dute.