Laugarren greba eguna, gizarte ekimeneko itunpeko ikastetxeetan

Gizarte ekimeneko itunpeko ikastetxeetako langileek laugarren greba eguna dute gaur, ELA, Steilas, CCOO, LAB eta UGT sindikatuek deituta. Guztira, ia 9.000 langile daude greba egitera deituta, hamar urte berritu gabe daraman lan-hitzarmena berritzea eskatzeko.

Grebak 120.000 ikasleri eta 215 ikastetxeri eragingo die; itunpeko irakaskuntzaren % 70i (ikastolak ez dira sartzen).

Atzoko grebaren jarraipena % 60 eta % 65 artekoa izan zen, sindikatuen arabera.

Hirugarren greba egunean elkarretaratzeak egin zituzten EAEko hiriburuetan. Gainera, Bilbon, Donostian, Gasteizen eta Bizkaiko Ezkerraldean protesta karabanak egin zituzten, auto-ilarak eraginez.

Gaur, ostirala, manifestazioa egingo dute Gasteizen. 11:30ean hasiko da martxa Bilbo Plazatik.

Sindikatuek ohartarazi dutenez, lanuzte gehiago egingo dituzte patronalak aurrerapausorik eman ezean.

Soldatak eta lan-baldintzak hobetzea eskatzen dute. Zehazki, honako eskaerak plazaratu dituzte: langileen erosahalmena berreskuratzea, Derrigorrezko Bigarren Hezkuntzako hezitzaileen soldata parekatzea, enpleguari eusteko akordioa hitzartzea, eta jaiotza-tasaren beherakadaren ondorioz itxi daitezkeen ikasgelen ondorioz gal daitezkeen postuei eustea.