LEPko salatzaileen hitzetan, Osakidetzak 'filtrazioen testigantzak ditu'

Osakidetzaren lan eskaintza publikoan irregulartasunak salatu zituzten hiru oposiziogilek gaur ziurtatu dutenez, Osakidetzak egindako ikerketan “filtrazioen testigantzak daude”.

“Demostraturik dagoen gauza bakarra filtrazioen frogarik ez dagoela da”, adierazi zuen Maria Jesus Mugica Osakidetzako zuzendariak. Hiru salatzailek Mugicaren adierazpenak gezurtatu dituzte orain, ESK sindikatuak argitaratutako agiri batean.

Salatzaileen ahotan, “ospitaletako espezialitate medikoen oposizio gehienetan, edo baliteke guztietan, iruzurra nagusi dela oso aspalditik jakina da Osakidetzako zentroetan”.

Horregatik, Eusko Jaurlaritza eta Osakidetza, Iñigo Urkullu lehendakaria eta Jon Darpon sailburua buru, “zelaiaren zona handiegia sokaz hesi nahian dabiltza”, LEPko irregulartasunak ukatuz.

“Jarrera horrek euskal eskuina Estatuko beste eskuinekin parekatzen du” eta EAJk bere egiten dituen balioak, hala nola “zintzotasuna, kudeaketan eraginkortasuna eta ongizate estatuaren defentsa”, zalantzan jartzen ditu.