3.651 langabe gutxiago zenbatu dituzte apirilean Hego Euskal Herrian

Hego Euskal Herriko enplegu zerbitzu publikoek 3.651 langabe gutxiago zenbatu dituzte apirilean, Espainiako Gobernuak jakinarazi dituen azken datuen arabera. Guztira, 159.423 langabe zeuden Hego Euskal Herrian apirilean.

Zehatz-mehatz, 2.260 pertsona gutxiago (-% 1,78) daude lan bila EAEn, martxoko datuekin alderatuta, eta 124.904 langabe daude guztira. Nafarroan, aldiz, 1.391 langabe gutxiago (-% 3,87) daude, eta 34.519 pertsona daude lanik gabe.

Urtebetean, hau da, 2017ko apiriletik, 12.104 langabe gutxiago zenbatu dituzte EAEn, hau da % 8,83 gutxiago. Nafarroako Foru Erkidegoari dagokionez, urtebetean 3.586 pertsona gutxiago daude langabezian (-% 10,05).

Datuak lurraldez lurralde aztertuta, Bizkaian 1.434 langabe gutxiago izan dira apirilean, aurreko hilabeteko datuekin alderatuta (- % 1,95), 571 pertsona gutxiago Gipuzkoan (- % 1,71) eta 255 pertsona gutxiago (- % 1,25) Araban. Gipuzkoan izan da urtebetean jaitsiera handiena (- % 11,27), Araban (- % 8,47) eta Bizkaian (- % 7,79) baino datu hobeak izan baitira bertan.

Espainiako datuei dagokienez, 86.683 langabe gutxiago izan dira apirilean, aurreko hilabeteko datuekin alderatuta. Guztira, 3.335.868 langabe zenbatu dituzte Espainian apirilean, 2009ko urtarriletik izandako zifrarik txikiena.