EAEko udaletxe eta foru aldundietan lau orduko lanuzteak izango dira otsailaren 28an

ELA eta LAB sindikatuek lau orduko lanuzteak deitu dituzte Araba, Bizkaia eta Gipuzkoako foru aldundietan eta udaletxeetan datorren otsailaren 28an. Deialdiak gaur goizean erregistratu dituzte.

Langileen baldintzak hobetzea, enplegua egonkortzea eta pribatizazio prozesuak gelditzea eskatzen dute.

30.000 pertsona inguruk egiten dute lan udaletxe, diputazio, erakunde autonomo eta enpresa publikoetan.

Ekaitz Oianguren ELAko ordezkariak ohartarazi du azken lau urteotan 3.400 lanpostu baino gehiago suntsitu direla sektore horretan. "Gainera, gero eta pribatizazio gehiago egiten ari dira", salatu du.

Joan den abendutik hona hainbat mobilizazio eta asanblada egin dituzte sindikatuek euren aldarrikapenen berri emateko, eta gaur udaletxe eta diputazioetako langile guztiei hilaren 28ko lanuztean parte hartzeko deia luzatu diete.

Oiangurenek jakinarazi du negoziazio kolektiboak urteak daramatzala blokeatuta. Horrenbestez, udaletxe bakoitzean negoziazio mahaiak abian jartzeko exijitzen diete erakundeei.

Horrez gain, aldi baterako kontratazioen tasa % 36tik gorakoa dela salatu du, Udalhitz itunaren arabera gehienez % 6koa izan beharko litzatekeenean. "Eskandalagarria eta onartezina da hori", azpimarratu du.