Ekonomia -
Nafarroa
Siemens Gamesako zuzendaritzak eta sindikatuek bilera, balizko kaleratzeak tarteko
Bideokonferentzia bidez egingo dute batzarra. Berregituraketak Sarrigurenen izan ditzakeen ondorioak zehaztuko dizkietela espero dute sindikatuek.
EITB.EUS
Siemens Gamesako zuzendaritzak bilera berri batera deitu ditu gaurko sindikatuak, joan den astean nazioartean iragarritako berregituraketak (6.000 kaleratze hiru urtetan) Sarrigurenen (Nafarroa) izan litzakeen ondorioez.
Asteazkenean beste batzar bat egin zuten bi aldeek, eta ordukoan bezala, bideokonferentzia bidez egingo dute hau ere. Sindikatuek espero dute oraingoan zuzendaritzaren asmo zehatzen berri izatea.
Izan ere, joan den asteko bileran zuzendaritzak ez zien kaleratzeen informaziorik eman. Azaldu zienez, multinazionalaren Europako Batzordean ari ziren kaleratzeen gaia aztertzen, eta hala, oraindik ezin zuten herrialde eta lantegi bakoitzean izan lezaketen ondorioak zehaztu. Xehetasunik ez jakiteak kezka sortu du langileen artean.
Nolanahi ere, Manu Ayerdi Nafarroako Gobernuko Garapen Ekonomikorako presidenteordeak ostiralean adierazi zuenez, exekutiboak ez du espero berregituraketak "eragin nabarmenik izatea Nafarroan". "Uler dezaket iragarpenak sortu duen kezka, baina oraingoz ez dugu eragin nabarmenik espero", azaldu zuen.
