Ekonomia -
Industria eolikoa
Siemensekin bat egiteko akordioa itxi du Gamesak
Astelehen honetan, nazioarteko talde eolikorik handiena osatuko duten bi enpresek izena eman dute Bizkaiko Merkataritza Erregistroan.
Agentziak | Erredakzioa
Nazioarteko talde eolikorik handiena osatzeko akordioa itxi du Gamesak astelehen honetan, Bizkaiko Merkataritza Erregistroan Siemensekin bat egiteko izena eman ostean. Bat-egite hori 2016ko ekainean iragarri zuten bi aldeek, elkarrekin industria eolikoaren talde handiena osatzeko asmoz.
Martxoan, Europako Kontseiluak akordio horri oniritzia eman zion eta, inolako baldintzarik jarri gabe, bat egitea gauzatzeko falta zen urrats bakarra Bizkaiko Merkataritza Erregistroan izena ematea zen.
Bi enpresa horien arteko akordioak jasotzen duenez, Gamesak 1.005 milioi euro banatuko ditu zatikizun gisa bere akziodunen artean. Apirilaren 11an egingo du ezohiko zatikizun horren ordainketa, konpainiak jakitera eman duenez.
Gainera, astearte honetan, apirilak 4, akordioa sinatu ondorengo lehen bilera egingo du administrazio kontseiluak. Bertan, goi karguak nortzuk osatuko duten erabakiko dute, hala nola, zuzendaritza taldea osatuko duten kideak.
Zehazki, Gamesako administrazio kontseilu berrian hamahiru kide egongo dira (Siemnes enpresak bost aukeratuko ditu, Iberdrolak bi, lau independenteak izango dira eta beste bi exekutiboak).
