Eusko Jaurlaritza eta Arcelor asteazken honetan bilduko dira berriro

Eusko Jaurlaritza eta Arcelor asteazken honetan berriro bilduko direla iragarri du Arantxa Tapia Garapen Ekonomiko eta Lehiakortasunerako sailburuak. Sestaoko ACBrentzako “epe luzerako” egitasmo “konkretu eta sinesgarri” bat aurkeztea espero du Tapiak, Exekutiboak enpresari lagundu ahal izateko.

ACB berriro zabaltzeko Arcelorren azken egitasmoa onartu zuten atzo Sestaoko langileek. 12.000 tonako ekoizpena eta lanpostuen erdia planteatu zituen zuzendaritzak.

Langileen erabakiarekiko “erabateko errespetua” agertu du sailburuak. Bideragarritasun plan “konkretu eta zehatz batek gutxieneko ekoizpena” bermatzen baldin badu, Gobernuak aztertuko duela agindu du Tapiak.

Zentzu horretan, iragan ostiraleko bileran enpresak “pauso bat” eman zuela onartu du Jaurlaritzako ordezkariak, bost urterako egitasmo bat aurkezteko “konpromisoa” hartu zuelako Arcelorrek.

Eusko Jaurlaritzak eta enpresa gaur berriz bilduko direla iragarri du Tapiak. Sailburuaren ahotan, Exekutiboa bilerara jarrera “oso kolaboratzaile”, “espiritu positibo” eta “paper zuri” batekin joango dela aurreratu du agintariak.

Hurbilketa

“Gaurko hurbilketa iragan ostiraleko bileraren emaitza da eta borondate onenarekin hasiko gara lanean, bi aldeak uste dut”, azpimarratu du Tapiak.

Horregatik, “ekoizpen eta lanpostuak mantentzeko, epe luzerako plan konkretu sinesgarri bat badago”, Eusko Jaurlaritzak lagundu ahal izango duela nabarmendu du.

“Akordio batera heltzea espero behar dugu”, erantsi du Tapiak. Hala ere, gaurko bileran ezer adostea baztertu du sailburuak, “gaur planaren azterketaren lehen pausoa baita”.