Ekonomia -
EIN
Espainiako BPGa % 1,4 hazi da, kontsumoak eta inbertsioek eraginda
Estatistikako Institutu Nazionalak jakitera eman duenez, eraikuntzaren sektorean errekuperazio zantzuak atzematen dira.
Erredakzioa
Espainiako ekonomiak 2014ko azken hiruhilekoan gora egin zuen, Espainiako Estatistika Institutu Nazionalak gaur emandako datuen arabera; BPGa % 1,4 hazi zen epealdi horretan, batez ere, kontsumo pribatuak gora egin zuelako eta inbertsioak ere hazi egin zirelako.
2014ko urritik abendura arteko datuei erreparatuta eta hiruhileko tasa aintzat hartuta, Espainiako ekonomia % 0,7 hazi da, aurreko urtean baino bi puntu gehiago. Estatistika Institutuaren arabera, 18 hilabetez jarraian egin du gora ekonomiak.
Etxeetako kontsumoa da igoeraren eragileetako bat; % 0,9 hazi da kontsumoa. Beste faktorea, berriz, inbertsioak dira, adituen arabera: % 1,4 egin dute gora inbertsioek, batez ere, eraikuntzaren sektoreak izandako suspertzeagatik.
Enplegua
Enpleguari dagokionez, lanaldi osoko lanpostuak kontuan hartuta, % 0,7 hazi zen iazko azken hiruhilekoan. Urte arteko datuen arabera, % 2,4 egin zuen gora enpleguak 2014an.
Industriaren, eraikuntzaren eta zerbitzuen alorrek erakutsi zuten jarrera positiboena; % 2,9, % 3,3 eta % 2,6 hazi ziren, hurrenez hurren.
