Rajoy: 'Gas merkatua erreformatzeko proposamenak entzuteko prest nago'

Mariano Rajoy Espainiako presidenteak Hidrokarburoen Legearen erreformaren inguruko azalpenak eman ditu gaur Kongresuan, Aitor Esteban EAJko diputatuak egindako galderari erantzunez. Lege horretan aurreikusita dagoen handizkako gas merkatuaren sorrerarekin lotutako "proposamen zentzuzkoak" entzuteko prest dago Espainiako Gobernua, Rajoyren arabera.

Gas hub berriaz (erlazionatutako zerbitzuen bidez gasaren elkartrukeak egitea ahalbidetzen duen enpresa bat da) eta alor horretan akordioak egiteko prest dagoen galdetzeaz gain, EAEn gasaren inguruan dagoen "tradizioa" azpimarratu du Estebanek, eta legea erreformatzerakoan "Euskadiko gas merkatua" aintzat hartu ez izana egotzi dio Espainiako Gobernuari.

Gobernuaren helburua "ekonomia lehiakortasuna berreskuratzea" dela eta lehiakortasuna lortzeko bidean "energia oinarrizkoa" dela erantzun dio Rajoyk, eta Hidrokarburoen Legearen erreformak Bilbokoa bezalako gas huben funtzionamendua ez duela eragotziko gaineratu du.

"Zentzuzko kostu energetikoak izateko eta sistemaren egonkortasuna bermatzeko onartu dugu sektore elektrikoaren erreforma. Horregatik dago orain Gorteetan Hidrokarburoen Legearen proiektua, helburu berberak dituelako", esan du.