Ekonomia -
Volkswagen BEZ-a
Marta Fernandez:'Volkswageni buruzko akordioak gatazkak ekidingo ditu'
Aurrekontuetako Estatu idazkariak adierazi duenez, Foru Gobernuaren eta Estatuaren arteko harremana ona izan da Volkswagenen BEZaren auzian.
Erredakzioa
Marta Fernandez Curras Aurrekontu eta Gastuen Estatu idazkariak gaur egindako adierazpenen arabera, Nafarroako Gobernuak eta Estatuak Volkswagenen BEZari buruz lorturiko akordioak bi administrazioen arteko etorkizuneko "gatazkak" saihestuko ditu.
Fernandez Currasek "Navarra Capital"ek antolaturiko gosari informatiboan parte hartu du, eta Volkswagenen auzian Estatuaren eta Foru Gobernuaren arteko harremanak "apartak" izan direla nabarmendu du bertan. "Modu egokian konpondu da, etorkizunean bi administrazioen arteko gatazkak saihesteko", gaineratu du.
Ildo horretan, gaineratu du gatazkak herritarrei bakarrik egiten diela kalte, eta Volkswageneko adibidea "erotzekoa" zela. Horregatik, konponbidea enpresa berari zergak bi aldiz ordaintzea izango zen ala ez galdetu du.
"Ogasun publikoan, tradizioa da gatazkak konpontzea", eta Administrazio elektronikoaren alorrean "ezin diegu herritarrei zeharkako presio fiskal gehigarria jarri", azaldu du.
Estatuak eta Nafarroako Gobernuak Hitzarmen Ekonomikoaren Negoziazio Batzordearen bileran parte hartuko dute laster, "egungo testuaren moldaketa adosteko" bien artean, eta ondoren Gorteek eta Nafarroako Parlamentuak berretsiko dutela erantsi du.
"Espainiako Gobernuak ez dio inoiz bizkarra eman Nafarroari", azpimarratu du Fernandez Currasek.
"Erreinu zahar horrekin, Espainiako giltzarrietako bat denarekin" kolaboratzeko borondatea erakutsi du Fernandez Currasek, eta borondate horren adibidetzat jarri ditu Hitzarmen Ekonomikoa aldatzeko negoziazioak abiatzea eta Volkswagenen BEZaren gainean akordioa lortzea.
