Fagor eta Edesako kaltedunek mobilizazioak gogortuko dituzte

Eskuratu elkarteak (Fagor Etxetresnak eta Edesa enpresetako kaltedunek osatutako plataforma) hemendik aurrerako protesta ekintzak gogortzea erabaki du gaur. Borondatezko ekarpenen bidez MCCren esku utzitako 13 milioi euro itzultzea eskatzen dute.

Basaurin egin duten batzarrean erabaki dute mobilizazioak areagotzea. 181 bazkide bildu dira bertan, eta horietatik 177k egin dute mobilizazioak gogortzearen alde.

Juan Antonio Perez Celis Eskuratu elkarteko eledunak jakitera eman duenez, ostiral honetarako auto-karabana deitu dute Basaurin, eta abenduaren 15ean Mondragon Taldeak Donostian egingo duen batzar orokorrera joango dira.

"Hartzekodunen lehiaketaren bidetik ezer berreskuratzeko itxaropen guztia galdu ostean" erabaki dute kaltedunek mobilizazioak gogortzea.

Eusko Jaurlaritzarekin eta alderdi politikoetako ordezkariekin harremanetan jarri da Eskuratu, Mondragon Taldearekin bitartekari lana egin dezaten, baina orain arte ez dute ezer lortu.

Eskuratu elkarteak 13 milioi euro itzultzea eskatzen du, eta kaltedunen beste plataformak, Ordainduk, 40 milioi euro eskatzen dizkio MCC taldeari.