Diru-bilketak % 10,1 gora egin du Gipuzkoan uztailaren 31ra arte

Uztailaren 31ra arte diru-bilketak % 10,1 gora egin eta aurreikuspenen gainetik jarraitzen du, Gipuzkoako Aldundiaren Ogasun Departamentuak gaur jakitera eman duenez.

Seigarren hilabetez jarraian diru-bilketak iazko zenbakiak gainditu ditu, Aldundiak agiri batean azaldu duenez.

Alde positiboan, BEZ, PFEZ eta Aberastasunaren eta Fortuna Handien gaineko Zergaren diru-sarrerak "gorakada aipagarria" izan duela goraipatu du Aldundiak. Gainera, Rover auziaren sententziarekin itzulpenak bukatu dira.

Bestalde, alde negatiboan, sozietate-zergaren diru-bilketak behera egin du. Zuzeneko zergen bidez % 3,8 gehiago bildu da, nahiz eta sozietate-zergak % 27,5 behera egin (22,7 milioi euro). PFEZ zergarekin bildutakoak % 5,4 gora egin du. Horrela, 31,8 milioi euro bildu dituzte zerga horrekin.

Aberastasunaren gaineko Zerga eta zeharkakoak

Aberastasunaren eta Fortuna Handien gaineko Zergaren lehen kanpaina uztailean bukatu zen. Ondarearen gaineko zergarekin alderatuta, % 36,2 gora egin du diru-bilketak. Honenbestez, 16,5 milioi gehiago bildu dituzte.

Zeharkako zergek gorakada "nabarmena" izan dute (% 13,8), BEZari esker batez ere. BEZaren diru-bilketak % 23,7 gora egin du.