CAFek 333 milioi euroko kontratua lortu du Txileko metroarekin

Euskadiko bi konpainiak, CAFek (Beasain) eta Idomek (Bilbo), kontratu garrantzitsuak lortu dituzte Txilen, Santiagoko metroaren linea berriak eraikitzeko, ETBk jakin izan duenez.

Hain zuzen ere, CAFek 450 milioi dolarreko (333 milioi euro) kontratua lortu du, Thales konpainia kanadarrarekin batera (partzuergoa osatu dute biek), 3. eta 6. linea berrien trenak eta CBTC gidatze sistema automatikoa hornitzeko, besteak beste.

Santiagoko metroak goratu egin du proiektuaren "eraginkortasun energetikoa". Izan ere, kontsumo txikiagoarekin, bidaiari gehiago garraiatzea ahalbidetuko duela zehaztu du.

Gainera, CAF-Thales partzuergoaren eskaintza "merkeena" eta "azterketa teknikoan nota altuena" lortu duena dela gaineratu du.

Bestalde, Idomi 8 milioi euroko kontratua esleitu diote, 6. lineako 10 geltokiak diseinatzeko.

Bilboko konpainiak egitura guztiak egin beharko ditu, hots, geltokien barrukoak zein kanpokoak (sarrerak, plazak, merkataritza lokalak...).

Egun, 80 pertsonak egiten dute lan proiektu honetan. Azken bi urteotan, enpresak ospitaleak eta garraio azpiegiturak egin ditu Txilen.