Edesan ekarpenak egin zituzten kaltedunek elkartea osatuko dute

Edesan borondatezko diru-ekarpenak, ekarpen bereziak eta partaidetza bereziak eginda kaltetu direnek elkartea osatuko dute, euren interesak modu eraginkorragoan babesten saiatzeko.

Kaltedunetako batek azaldu duenaren arabera, bilera ostegun honetan, Basauriko Kultur Etxean, izango da, eta kaltedun guztiei zuzendua dago, baina, batez ere, pentsiodunentzat eta aurretik erretiratu direnentzat.

Bilera horretan,ekimenaren sustatzaileak kaltedunen elkartea osatuko dute eta helburua euren interesak babestea izango da. "Konkurtsora joango gara, abokatuak izendatuko ditugu, behar dugun guztia egingo dugu, geure interesak babesteko", esan dute.

Gaur egun dagoeneko Ordaindu izeneko plataforma bat dago eta horren ordezkariek adierazi dute Basauriko kaltedunek iragarri zietela elkartea sortzeko asmoa zutela eta denen artean elkarte bat sortzeko aukera aztertzeko eskatu zietela. Ordainduk proposamena aztertuko duela adierazi du.

Bestalde, Ordainduk ostegun honetan ere asanblada egingo du, Arrasaten, bizi duten egoerari eta euren aldarrikapenak kontuan hartzeko eman behar dituzten pausoei buruz hitz egiteko.