La Naval kontratuak negoziatzen ari dela iragarri du Aldundiak

Imanol Pradales Bizkaiko Foru Aldundiko Ekonomia Sustatzeko diputatuak iragarri du La Naval lan-karga lortzeko "negoziatzen" ari direla, eta kontratu horietako batzuk otsailean bertan edo martxoan sinatzeko moduan egon daitezkeela.

Euskadi Irratian egindako elkarrizketa batean azaldu duenez, "harreman zuzena" du La Navalen zuzendaritzarekin eta beste ontziola batzuekin, eta "negoziazioak irekita" eta "otsailean bertan edo martxoan" ixteko aukera dagoela adierazi du.

Diputatuak, hala ere, ez die "lasaitasuna" eskatu langileei, kontratuak lortzea "zaila" izango baita.

Ekonomia Sustatzeko foru diputatuak azaldu duenez, La Naval enpresa pribatua da; beraz, beste enpresa batzuekin lehiatzen da lana lortzeko.

Horren harira, "barku txikiak edo oso bereziak" (atun itsasontziak, ontzi izotz-hausleak eta abar) egiten dituztenekin bereizi du La Naval. Izan ere, Murueta, Zamakona eta Balentziaga kontratuak lortzen ari dira, haien merkatua "oso desberdina" delako, bai bezeroak bai lehiakortasuna oso bestelakoak baitira.

Gainera, ontziola horietan "tax lease" delakoaren eragina txikiagoa izan omen da ontzi handiak egiten dituzten enpresetan baino, foru diputatuaren esanetan.