Krisi Ekonomikoa -
Presioa areagotzeko neurriak
La Navaleko langileek protestak areagotuko dituzte lan-karga eskatzeko
Otsailaren 10etik martxoaren 4ra arte, Sestaoko plantako beharginek grebak, itxialdiak, elkarretaratzeak eta manifestazioak egingo dituzte.
Erredakzioa
Sestaoko La Naval ontziolako langileek protesta eta ekintza gehiago egingo dituzte, bihartik -otsailaren 10- hasita, martxoaren 4ra arte, grebak, itxialdiak, elkarretaratzeak eta manifestazioak eginda.
Langileen batzordeak deituta, ekintza berri hauen bidez presioa areagotu nahi dute, erakundeak, Jaurlaritza, alderdi politikoak eta jabeak "mugiarazi eta ontziolaren alde egiteko, enplegua sortu eta aberastasun ekonomikoa eta soziala lortzeko".
Horrela, langileek Murueta Ontziolako atarian elkarretaratzea egingo dute Bilbon eta, asteazkenean, 10:30etik 12:30ra lanuzte bat egiteaz gain, Zamudioko Parke Teknologikoan, Ingeteamen egoitzaren aurrean, beste protesta bat egingo dute.
Otsailaren 18an, langileen batzordeak ontziolan bertan 24 orduko itxialdi bat egiteko deialdia luzatu die langileei, 06:00etan hasita, eta lantegian bi orduko lanuztea ere egingo dute.
Bi egun geroago, Gasteizen, Legebiltzarraren aurrean, elkarretaratze bat egingo dute; asteazkenean, 26an, lau orduko lanuztea eta ontziolatik abiatuta Santurtziraino manifestazio bat egingo dute.
Azkenik, martxoaren 4an, hiru orduko lanuztea egingo dute lantegi osoan, eta langileek Guggenheim Museoaren aitzinean protesta egingo dute, Biltzar Ekonomikoa egingo dela aprobetxatuta, eta Gobernu espainiarreko, Jaurlaritzako eta nazioarteko erakunde ekonomikoetako ordezkariak ere bertan izango direla aprobetxatuta.
