Krisi Ekonomikoa -
EAJ-PP akordioa
EAJk eta PPk zuzenketak baztertu dituzte Bizkaiko Aurrekontuetan
PSE-EEk eta Bilduk aurkeztutako osoko zuzenketak atzera bota dituzte, eta, beraz, Bizkaiko aurrekontuek bidea egiten jarraituko dute Batzar Nagusietan.
2013ko Bizkaiko aurrekontuek bidea egiten jarraitzen dute Batzar Nagusietan. Gaurko osoko bilkuran PSE-EEk eta Bilduk aurrekontuei egindako osoko zuzenketak bozkatu dituzte, eta EAJk eta PPk beren botoak batu eta atzera bota dituzte zuzenketok.
Alderdi Popularrak aurrez iragarri zuen ez zituela PSE-EEren eta Bilduren osoko zuzenketak babestuko. Azkenean, popularrek eta jeltzaleek aurkako botoa ematea erabaki dute.
Sozialisten osoko zuzenketak kontrako 30 boto jaso ditu, eta Alderdi Sozialistak eta Bilduk babestu dute. Bilduk aurkeztutako zuzenketaren gaineko bozketan ere popularrek eta jeltzaleek kontrako botoa eman dute, eta sozialistek eta Bilduk, aldekoa.
Beraz, aurrekontu proiektuaren tramitazioak aurrera egingo du Batzar Nagusietan, eta zuzenketa partzialak adosteko hitz egiten ari dira PP eta EAJ. Popularrek jakinarazi dutenez, jeltzaleek beren zuzenketak onartzen badituzte aurrekontuen alde bozkatuko dute.
Bizkaiko aurrekontu proiektuaren arabera, 6.578 milioi euro izango ditu Diputazioak gastatzeko, duela urtebete baino % 4,3 gutxiago.
