Cibona-Caja Laboral, (75-78): Lehen garaipena 'Top 16'an

Caja Laboral Baskoniak bere lehen garaipena lortu zuen Euroligako ''Top 16''an. Bigarren ihardunaldian Cibonari Zagreben 75-78 irabazi zion.

Partida talde kroaziarraren aldeko 7-0eko partzialarekin hasi zen eta Baskoniari asko kostatzen zitzaion saskiraketak lortzea. Lehen laurdena bukatzeko bi minutu falta zirenean puntu bakarrera hurbildu zen Caja Laboral (11-10), baina etxeko taldea ez zen kokildu eta abantaila polita lortu zuen laurdenaren bukaeran. Lehen hamar minutuak etxeko taldearen aldeko 23-13ko emaitzarekin bukatu ziren.

Bigarren laurdenaren hasiera lehenaren antzerakoa izan zen. Cibonak 5-0eko partzialarekin ekin zion laurdenari 15 puntuko aldea lortuz (28-13). Ondoren, Baskoniaren erreakzio txikia etorri zen eta norgehiagoka 41-33ko emaitzarekin iritsi zen atsedenaldira.

Atsedenalditik bueltan Caja Laboral indartsuago kantxaratu zen. Defentsan sendoago eta erasoan hobeto aritu ziren gasteiztarrak eta laurdenaren erdialdean Baskoniak partida berdintzea lortu zuen (50-50). Ondoren hainbat berdinketa egon ziren (52-52, 54-54, 56-56 eta 58-58) eta hirugarren laurdena Cibonaren aldeko bi puntuko abantailarekin bukatu zen (60-58).

Azken laurdena ez zen ondo hasi arabarrentzat. Hainbat minutu eman zituzten saskiratzerik lortu gabe eta egoera hori ondo baliatu zuen Zagrebeko taldeak (67-60). Pixkanaka, akatsak konpontzen joan zen Baskonia eta partida bukaerarako 2:42 falta zirenean aurrea hartu zuen markagailuan (69-71). Ordutik aurrera markagailua oso parekatuta egon zen azkeneraino, baina garaipena Caja Laboralek lortu zuen (75-78).