Osasuna-Real Madril, (1-0): Gorritxoen garaipenak Liga erabaki du

Osasunak garaipen garrantzitsua lortu du Reyno de Navarran Real Madrili 1-0 irabazi ondoren. Garaipen honekin arnasa lasai hartzen dute gorritxoek eta Liga ia erabakita utzi dute Real Madril Bartzelona liderrarengandik zazpi puntura geratzen baita.

Partida hasieran erritmo bizia eman zion Osasunak eta laugarren minutuan Corok eman zuen lehen abisua, baina bere jaurtiketa kanpora joan zen. Ondoren Real madrilen erantzuna etorri zen Benzema, ordea, ez zen errematera iritsi Di Mariaren erdiraketa baten ondoren. Real Madril nagusi izan zen 30. minututik atsedenaldira arte. Benzemaren jaurtiketa kanpora joan zen eta ondoren Ricardok erantzun bikaina eman zion aurrelari frantziarraren jaurtiketari. Osasunak ere izan zuen 1-0ekoa sartzeko aukera. Pandiani bakarrik zegoen errematea egiteko, baina bere burukada kanpora bidali zuen oso aukera garbia huts eginez. Lehen zatiaren azken minutuetan Cristiano Ronaldo bakarrik geratu da Ricardo atezainaren aurrean eta honek buruz burukoa salbatu du. Honenbestez, golik gabe bukatu da lehen zatia (0-0).

Bigarren zatian tentsioa izan zen nagusi, baina joko gutxi. Lehen aukera Real Madrilek izan zuen nahiz eta Carvalhoren burukada kanpora joan zen 57. minutuan. Bost minutu beranduago Camuñasek jokaldi bikaina egin eta 1-0eko sartu zuen. Osasunako jokalariak Arbeloaren eta Carvalhoren arteko hutsaz baliatu zen eta Casillas gainditu zuen.

Lehen gola hartu ondoren Real Madrilek erasora jo zuen. Osasuna ondo aritu zen defentsa lanean. Ozilen jaurtiketa bat eta Benzemaren burukada bat izan ziren madrildarren arrisku jokaldi aipagarrienak gola hartu eta gero. Osasunak 2-0koa sartzeko aukera bikaina izan zuen azken minutuetan. Arandak jokaldi bikaina egin zuen eta Arbeloak atera zuen baloia atepetik. Luzapenean Real Madril saiatu zen, baina Osasunak ez zuen gehiegi sufritu eta garaipena etxean geratu zen (1-0).

Garipen honekin, Osasuna jaitsiera postuetatik hiru puntura geratzen da eta Camachok taldea zuzentzen jarraituko du.

Fitxa teknikoa:

1 - Osasuna: Ricardo; Damia, Sergio, Miguel Flaño, Nelson; Puñal, Soriano (Vadocz, m.46); Coro (Calleja, m.93), Pandiani (Lolo, m.82), Camuñas; eta Aranda.

0 - Real Madril: Iker Casillas; Sergio Ramos, Raul Albiol (Kaka, m.65), Carvalho, Arbeloa; Lass (Xabi Alonso, m.65), Khedira; Di Maria (Adebayor, m.65), Özil, Cristiano Ronaldo; eta Benzema.

Gola: 1-0, m.62: Camuñas.
Epailea: Muñiz Fernandez.