Osasuna
BBVA Liga
Bartzelona-Osasuna, (2-0): Partida ona, baina punturik ez
Andoni Beldarrain
Erredakzioa
Talde gorritxoak lehen zati bikaina jokatu zuen. Bigarrenean, ordea, etxeko taldea izan zen jaun eta jabe.
Osasunak partida ona jokatu zuen Bartzelonaren aurka Camp Noun, baina Barça gainditzeko hori baino gehiago egin behar da. Lehen zati bikaina jokatu zuen talde gorritxoak, baina bigarrenean erraz nagusitu zen Guardiolaren taldea.
Partida erritmo biziarekin hasi zen eta bi taldeek gol aukera mordoa sortu zituzten. Hasi eta jarraian, lehen minutuan, Ricardok erantzun bikaina eman zion Ibrahimovicen jaurtiketari. Hiru minutu beranduago Osasunaren erantzuna etorri zen. Vadocz bakarrik geratu zen Victor Valdesen aurrean, baina atezain katalanak gorritxoen gola eragotzi zuen. Joan etorriko partida eroa ikusten ari ziren Camp Noun. Hamaseigarren minutuan Henryk baloia Ricardoren gainetik loratu nahi izan zuen eta talde nafarreko atezainak Bartzelonaren gola eragotzi zuen.
Hasiera bizi horren ondoren lasaitasuna etorri zen. 25. minututik aurrera ia ez zen gol aukerarik egon eta lehen zatia 0-0eko emaitzarekin amaitu zen.
Bigarren zatian Bartzelona izan zen jaun eta jabe. Osasunak ez zuen gol aukera bakarra ere sortu. Messik aukera bikoitza izan zuen 57. eta 58. minutuan. Lehenegoan ez zen Pedritoren erdiraketara iritsi eta bigarrenean bere burukada kanpora joan zen. 63. minutuan Toure Yayaren burukada gutxigatik kanpora joan zen eta 70.ean Ricardok erantzun ona eman zion Keitaren burukadari.
Bartzelona ekin eta ekin ari zen golaren bila eta 72. minutuan aurkitu zuen. Maxwellek pase dotorea eman zion Ibrahimovici eta sueziarrak ez zeun barkatu 1-0ekoa sartuz.
Markagailuan aurrea hartu ondoren Bartzelonak erraz jokatu zuen. Messik bigarrena sartzeko aukera izan zuen. Argentinarra area barruan sartu zen aurkari guztiak atzean utzita eta bere jaurtiketak zutoina jo zuen. Guardiolaren taldeak ez zuen partida erabakita uzten, baina 88. minutuan Iniestak pase bikaina eman zion Bojani eta honek 2-0ekoa sartu zuen. Emaitza horrekin amaitu zen partida eta Osasuna puntu gabe itzuli zen Camp Noutik.
Fitxa teknikoa:
2. Bartzelona:Valdes; Alves, Puyol, Milito, Maxwell; Iniesta, Busquets (Keita, 69. min), Toure Yaya; Messi, Ibrahimovic (Bojan, 74. min) eta Henry (Pedro, 46. min).
0. Osasuna: Ricardo; Azpilicueta,Miguel Flaño, Josetxo, Monreal; Puñal, Nekounam (Calleja, 78. min);Juanfran (Ruper, 78. min), Vadocz, Camuñas; eta Masoud (Galán, 85. min).
Golak:
1-0, 73. min: Ibrahimovic.
2-0, 89. min: Bojan.
