Reala-Athletic, (2-0): Derbia, txuri-urdinentzat

Realak irabazi du Anoetan Athleticen aurka jokatu duen euskal derbia. Txuri-urdinek 2-0eko emaitzarekin irabazi dute. Xabi Prieto (penaltiz) eta Mikel San Jose (bere atean) izan dira golegileak.

Partida talde bakoitzarentzat aukera banarekin hasi zen. Lehena, Griezmannek ateratako falta baten ondorioz etorri zen eta Athleticen erantzuna San Joseren erremate baten bitartez iritsi zen. Claudio Bravok erantzun bikaina eman zion Athleticeko defentsaren jaurtiketari. Minutu batzuk pasa ondoren, Gabilondok izan zuen gol aukera bikaina. Area barruan sartu zen, baina bere jaurtiketa oso gurutzatuta kanpora joan zen. Berdintasuna nagusi zen ondorengo minutuetan etorri zen lehen zatiko jokaldi erabakigarria. Epaileak Realaren aldeko penaltia adierazi zuen San Josek baloia eskuarekin moztu baitzuen area barruan. Xabi Prietok penaltia jaurti eta gola sartu zuen, baina epaileak penaltia errepikatu behar zela esan zuen Realeko jokalaria gelditu egin baitzen jaurtiketa egin aurretik. Xabi Prietok berak bota zuen bigarren aldiz penaltia eta Iraizoz gainditu zuen 1-0ekoa eginez.

Athleticek partida berdintzeko aukera ona izan zuen 31. minutuan, baina Gurpegiren burukada zutoina urratuz kanpora joan zen. Minutu gutxi geroago talde txuri-urdinak aldeak handitzeko aukera izan zuen. Griezmannek baloia lapurtu zuen Iraizozen aurrean (atezainari falta eginez), bakarrik geratu zen ate aurrean eta baloia zutoinera bidali zuen. Lehen zatiko azken aukera Athleticek izan zuen. Susaeta 41. minutuan area barruan sartu zen eta bere jaurtiketa gutxigatik kanpora joan zen. Horrenbestez, lehen zatia Realaren aldeko 1-0ekoarekin bukatu zen.

Bigarren zatia hasi eta jarraian Realak 2-0ekoa sartu du. Mikel San Jose Athleticeko jokalariak bere atean sartu du baloia arriskurik ez zuen Xabi Prietoren erdiraketa baten ondoren.

Markagailua alde zuela (2-0) Realak ez du arazorik izan emaitza mantentzeko eta ez du arazorik izan defentsa lanean. Gainera, hirugarren sartzeko aukera ona izan zuten txuri-urdinek. Joseba Llorentek 64. minutuan burukada langa gainetik kanpora bidali zuen. Athleticen portaera tamalgarria izan zen bigarren gola hartu zuenetik. Besoak jatsi zituzten zuri-gorriek eta azkenean Realak eraman zuen garaipena 2-0eko emaitzarekin.

Garaipen honekin, talde txuri-urdina Europa Leguerako sailkapen postuetan sartu da.

Fitxa teknikoa:

2-Reala:Bravo; Carlos Martinez, Ansotegi, Mikel Gonzalez, De la Bella; Rivas,Aranburu (Bergara, min. 43), Xabi Prieto, Griezmann, Zurutuza (Labaka,min. 73); Joseba Llorente (Agirretxe, min. 80).

0-Athletic:Iraizoz; Amorebieta, San Jose (Iturraspe, min. 73), Iraola, Aurtenetxe(Orbaiz, min. 56); Javi Martinez , Gurpegi, Muniain, Gabilondo(Toquero, min. 46), Susaeta; Fernando Llorente.

Epailea: Ramirez Dominguez.

Golak: 1-0. min. 25 : Xabi Prieto, penaltiz. 2-0. min. 48: San Jose, bere atean.

Euskal derbia minutuz minutu jarraitu dugu eitb.com-en.