Athletic Club
Larunbatean, 21:00etan
Real Madril-Athletic: Ezinezkoa?
Haritz Gallastegi
Lezama
Caparrosek konfiantzarekin jokatzeko eskatu die jokalariei Real Madrili aurre egin eta Europarekin amets egiten jarraitzeko.
Real Madrilek eta Athleticek jokatuko duten partidari begira zale zuri-gorriak baikor egoteko arrazoi bakar bat aurkitzea lan gaitza da oso. Estatistikei erreparatuz gero ezin ezer positiborik aurkitu. Athleticek garaipen bakarra eskuratu baitu Bernabeun azken hamarkadan. Bi taldeen maila aztertuz gero ere bistan da zuriek abantaila dutela. Eta bi taldeen dinamikek ere galtzaile ematen dute Athletic. Izan ere, zuri-gorriak ezinean ari dira txapelketaren azken txanpan. Real Madril, berriz, indartsu eta gogotsu ari da. Talde garaiezina dirudi egun.
Baina, zorionez, partidak jokatu egin behar dira. Gainera, ez du beti onenak irabazten. Ezustekoak izaten dira futbolean. Ba, ezustekoa ematen ahaleginduko da Athletic. Horretarako, neurketa borobila jokatu beharko du talde bizkaitarrak. "Gaitza da, baina aukera izango dugu. Konfiantza izan behar dugu. Lan ona egin dezakegula pentsatu behar dugu. Eta, era berean, bai talde lanean eta baita banakako lanean ere sendo aritu beharko gara", esan du Caparrosek. Neurketa perfektua egitea esaten zaio horri.
Javi Martinez taldera itzuliko da
Aiegiko jokalaria osatu da eta prest dago taldeari laguntzeko. Malagaren aurka atseden hartu ostean, Caparrosek taldeko birika berreskuratuko du. Aiegiko jokalariarekin batera Koikili ere hamaikaora bueltatuko da. Castillo eta David Lopez, berriz, deialditik kanpo geratu dira.
Santiagpo Bernabeu
21:00
Muñiz Fernandez
Athletic: Iraizoz; Iraola, San Jose, Amorebieta, Koikili; Gurpegi, Javi Martinez, Iturraspe, Gabilondo; Toquero eta Llorente.
