Txoriene
Gastronomia
Leire Olaberria, dieta begetarianoa eta Danborrada, asteon 'Txoriene'n
EITB
EITB
Leire Olaberriak abiatu du astea, eta Aritz Urdanpilleta izan dugu jarraian sukaldean. Kresala eta Artzai Gazta elkarteak izan dira gero, eta Debako Izenbe tabernaren txanda izango da, bukatzeko.
Leire Olaberria kirolaria, Aritz Urdanpilleta aditua, Donostiako Kresala elkartea, Artzai Gazta elkarteko Luisa Villegas eta Debako Izenbe taberna izango dira aste honetan 'Txoriene' gastronomia saioko protagonistak. Arratsaldero, 15:00etan hasita, otordu sanoak eta gozoak prestatuko ditu Zigor Iturrietak.
Astelehenetan, kirolariak izan ohi dira gonbidatu ETB1eko saioan. Oraingoan, Leire Olaberria pistako txirrindularia izan da. Izokin ketu krepeak jogurt eta laranja saltsarekin, txipiroiak plantxan eta fruta irabiakia txia haziekin prestatzen lagundu dio Ikaztegietakoak Zigor Iturrietari.
Asteartean, nutrizioaren alorrean lan egiten duten adituen saioan, Aritz Urdanpilleta kirol-elikaduran adituaren txanda izan da. Kasu honetan, kirola eta dieta begetarianoa nola uztartu azaldu digu, eta barazki futomakia eta artatxiki eta txitxirio hanburgesak prestatu dizkigu.
Asteazkenean, Danborrada egunean, Donostiako Alde Zaharrean dagoen Kresala elkarteko Pako Sexmilo eta Iñigo Basagoiti izan ditugu gonbidatu. Egun berezi honetarako menu aproposa prestatu digute: tomate entsalada, mihiarraina saltsan, untxia Kresala erara eta torradak.
Ostegunean, hornitzaileen eguna izan ohi dugu. Oraingoan, Arabako, Gipuzkoako, Bizkaiko eta Nafarroako 111 artzain eta gaztagilek osatzen duten Artzai Gazta elkarteko Luisa Villegas izango da Zigor Iturrietarekin sukaldean. Idiazabal gazta duten errezetak egingo dizkigu: hostopila onddoz eta zigala isatsez beteta, artzain-gazta kristalekin, eta pasta freskoa basa-izokin ketuarekin, bakailao ketuarekin eta artzain-gazta ketuarekin.
Astea amaitzeko, pintxoak jatera joan gara Deba aldera. Izenbe tabernako Marian eta Marijose Juaristi sartu dira ETB1eko sukaldean, eta euren tabernan ospe handia duten bi pintxo prestatuko dituzte Zigor Iturrietaren laguntzarekin: patata tortilla eta urdaiazpiko kroketak.
Astelehenetik ostiralera, 15:00etan hasita, plater goxo eta osasungarriak prestatzen irakasten du Zigor Iturrietak 'Txoriene'n, ETB1en eta eitb.eus-en.
