Kuko jatetxeko Iker Markinez, 'Txoriene'n

Ormaiztegin dago Kuko jatetxea, Zumalakarregi museotik gertu. Iker Markinez da lokal txiki eta atsegin horretako arduradun eta sukaldaria. Etxean bezala sentitzen da bezeroa Kukon, mimoz eta goxotasunez hartzen baitzaituzte Iker eta bere taldeak. Goxotasuna eta mimoa kartako plateretan ere nabaritzen da. Garain garaiko produktuak erabiltzen dira Kukon, urte-sasoi bakoitzeko produktuen arabera karta aldatuz. Guztia mimoz prestatzen dute, ukitu berezi eta berritzailea emanez plater bakoitzari. Ikerrek dioenez, "Kukon estilo berezia, propioa jarraitzen dugu eta osagai freskoekin jolastu egiten dugu sukaldean".

Iker Markinez beasaindarrak sukaldaritza ikasketak hainbat lekutan burutu ondoren, bere lokal propioa irekitzea erabaki zuen. Ormaiztegi aukeratu zuen bere proiektua abian jartzeko. Ordutik, bere lana goierritarrei eta eskualde kanpotik gerturatzen direnei eskaini die.

Xuban Intxaustik gidatzen duen "Txoriene" saioan bere errezeta goxoenen sekretuak azalduko ditu Ikerrek. Astelehenean espagetiak barrengorri eta tomatearekin eta 'Kikoman' kurruskariak prestatuko ditu. Astearteko errezetak, berriz, Kantauriko antxoa frijitua piperradarekin eta ziza nahaskia izango dira. Barazki panatxea entsaladan, urdaiazpiko frijitu eta Idiazabal gaztarekin eta anana errea prestatuko ditu asteazkenan. Osteguneko platerak amonaren bizkotxoa eta arrozezko odolki buñueloak Gernikako piperrekin izango dira eta azkenik, ostiralean, txekor azpizuna foie eta Porto saltsarekin eta almejak txakoli erara prestatuko ditu.