Prestaketa

Hasteko, tipulatxak eta baratxuriak zuritu eta zatitu egingo ditugu.

Jarraian, eltze batean, tipulatxak eta baratxuriak gatz apur batekin gurinetan erregosiko ditugu. Gorritzen direnean, pipermina, otarrainxken buruak eta azalak gehituko ditugu. Koilara baten laguntzarekin otarrainxken buruak zapalduko ditugu.

Honen ondoren, usain-belarrak gehitu eta otarraina bere oskolarekin zatituta gehituko dugu. Koilararekin bueltak emanez, bi minuturen ostean, pattarra gehitu eta sua emango diogu flanbeatzeko.

Jarraian, otarrainaren isats zatiak eta pipermina eltzetik atera eta zapoaren hezurrak eta buruak sartuko ditugu, baita pipermina, perrexila eta tomateak ere. Guztia su bizi samarrean 3 minutuz egosten utzi ondoren, ura gehitu, gatzean ondu eta 10-12 minutuz egosten utziko dugu.

Saltsaren oinarria egina dagoenean, otarrainaren burua eta zapoaren hezurrak atera eta gelditzen dena irabiagailuaren laguntzarekin birrinduko dugu. Jarraian, iragazkiaren laguntzarekin bahetu eta saltsa fin-fina utziko dugu.

Zartagin batean, oliba oliotan, gatzean onduak izango ditugun zapoaren isatsak eta otarrainxkak markatuko ditugu. Segidan, otarrainaren isats zatiak gehitu eta saltsarekin estaliko ditugu. Bi-hiru minutuz su-eztitzen utzi eta platerean zerbitzatu, perrexil txikituarekin apainduta.