Prestaketa

Saltsa

Azenarioak, tipulak eta baratxuriak zuritu eta zatituko ditugu. Eltze sakon batean oliba olio txorrotada eder bat berotu eta baratxuria bertan gorritu. Segidan, tipula erantsi, gatz apur bat gehitu eta erregosi.

Tipula erregosten denean, azenario zatiak gehitu eta pare bat buelta eman ondoren, pattarra erantsi. Sua bizitu eta murrizten utzi.

Pattarra murriztu denean, ardoa erantsi eta prozedura bera jarraitu.

Segidan, haragi salda erantsi, gatzez ondu eta 20 minutuz irakiten utzi.

Ondoren, irina edalontzi batean uretan disolbatu eta eltzekoari erantsi. Pare bat minutuz irakiten utzi, koilararekin eragiteari utzi gabe.

Azkenik, irabiagailuarekin birrindu eta gordeko dugu.

Patatak

Labea 220 ºC-tan berotzen jarri goitik eta behetik. Patatak zuritu eta kraskatu, maria estiloan. Ondoren, labeko erretiluan jarriko dugun paper sulfatatu gainean zabaldu. Oliba olio txorrotada bat gehitu, gatzez ondu eta 10 minutuz laberatu.

Patatak labetik ateratakoan, erretiluari paper sulfatatua kendu haragi bolak bertan egiteko.

Haragi bolak

Labea grill eran jarriko dugu.

Bitartean, katilu batean ogi zatiak esnetan beratzen jarriko ditugu.

Ontzi sakon batean haragi txikitua eta gainerako osagaiak batu, esne beratua barne. Guztia ongi nahasi eta haragi bolak egin. Egin ahala, ogi birrindutik pasatu eta labeko erretiluan ipini.

Guztiak ditugunean, oliba olio txorrotada bat bota gainetik eta labeko goiko aldean sartu, haragi bolen goialdea ahalik eta azkarren gainerretzeko. Alde batetik gorritzen direnean, buelta eman eta beste aldetik gorritu arte laberatu berriz.

Segidan, erretilua labetik atera, labea 180 gradutara jaitsi, haizegailua kendu eta beroa goitik eta behetik jarri.

Bazterrean utzi dugun saltsa haragi bolen gainera iragaziko dugu eta patatak gehitu ditugu. Barrengorri eta ilarrak pototik atera eta ura iragazi ondoren, erretilukoari erantsiko dizkiogu eta 15-20 minutuz laberatuko dugu

Aurkezpena

Haragi bolak kaxuelitetan egoki banatuko ditugu. Nahi bada, ogi xerra bat zartaginean txigortu eta apaingarri gisa haragi bolen ondoan jarri daiteke.