Prestaketa

Labea 200 ºC-tan aurrez berotzen jarriko dugu goitik eta behetik.

Segidan, arkume-saiheskia ongi garbituko dugu: gantzak kendu eta hezurrak haragitik ongi bereiziko ditugu eta hauek aluminiozko paperaz bilduko ditugu, labean ez erretzeko. Honen ondoren, zartagin batean olio apur batekin alde guztietatik gorrituko dugu.

Bien bitartean, gozagarria egingo dugu. Honetarako, baratxuriak prentsatzailearen laguntzarekin xehetuko ditugu eta oliba oliotan ipiniko ditugu ezkaiarekin, modenako ozpinarekin eta eztiarekin batera.

Arkume-saiheskia gorritu denean, pintzel baten laguntzarekin gozagarriarekin igurtziko dugu.

Bestalde, patatak eta tipulatxak zuritu eta fin-fin zatituko ditugu; pataten kasuan, panadera eran.

Labeko erretiluan ohe moduan patatak eta tipulatxa jarriko ditugu lehenik. Jarraian, arkumea. Guztia 20-25 minutuz laberatuko dugu, denbora horretan birritan gozagarriarekin igurtziz. Denbora amaitzean, labea itzali eta 10 minutuz bere horretan egoten utziko dugu, labeko atea ireki gabe.

Zerbitzatzeko garaian, bere zukuarekin batera atera platerera.