Prestaketa

Alde batetik saltsa amerikarra egingo dugu. Horretarako, ontzi batean olioa eta barazkiak zatituta jarriko ditugu erregosten. Barazkiak erregosita daudenean, ganba-buruak gehituko dizkiogu eta ongi karamelatzen utziko dugu. Orduan irina gehituko dugu eta dena ongi nahastuko dugu irina ondo desegiteko. Tomate saltsa gehituko dugu eta fumeta. Fumeta egiteko ura eta arrain hezurrak egosiko ditugu. Saltsa irabiatuko dugu eta horretarako sobratu zaigun bexamela gehituko diogu. Gatza bota eta puntuan jarri.

Olio apur batekin ganba zurituak salteatu eta zatituko ditugu (buruak saltsa amerikarrerako erabiliko ditugu). Onddo konfitatuak ere xehe-xehe zatituko ditugu eta bexamelari eransteko gorde. Bexamela egiteko, esnea irakingo dugu eta beste ontzi batean olioa eta irina nahastuko ditugu sutan. Irina desegiten denean (roux deitzen zaio horri) esnea gehituko diogu eta etengabe eragingo dugu itsatsi ez dadin. 15 minutuz irakingo dugu, gatza bota eta, ganbak eta onddoak gehituko dizkiogu. Hozten utzi eta masa horrekin koilarakada bat jarriko dugu legatz zatitxoen gainean. Beste legatz zatitxo batekin estali eta izkinak ongi prentsatu, bexamelak ez alde egiteko. Sobratu zaigun bexamela saltsa amerikarrari gehituko diogu. Legatz zatiak irinetatik eta arrautza irabiatutatik pasa eta olio berotan frijitu. Ondo frijitzen direnean, legatz zatiak paper baten gainean jarri olioa xurgatzeko. Plater batean jarri legatz zati bakoitza eta gainetik saltsa pixka bat gehitu.