Jose Luis Korta gonbidatu, gaur, 'Karabana' saioan

Pasai Donibanen egongo dira gaur 'Karabana' saiokoak. Bertan, Jose Luis Korta San Juan arraun taldeko entrenatzaile izendatu berria izango dute gonbidatu Zigor Iturrietak eta Itxaso Gonzalezek.

Ohi denez, herriko sukaldari amateurrak hartuko dituzte saioko platoan: Inaxiok eta Xabik antxoak prestatuko dituzte; Jabierrek eta Karlosek, berriz, itsas zapoa kalderetarekin.

Horiez gain, beste hauek guztiak izango dituzte gonbidatu: Rosa Sistiaga Habanerak taldeko kidea, Iñaki Lopetegi sukaldaria, Sara Mansilla abeslaria, Eneko Sein astazaina eta Xatur Telletxea Santa Ana aterpetxeko jabea.

'Karabana' saioa gaur 21:15ean izango dugu ikusgai ETB1en eta eitb.eus-en.