Prestaketa

Arrain fumeta

Saltsa berdea ligatzeko erabiliko dugun fumeta martxan jarriko dugu lehendabizi. Ura irakiten jarri eta legatzaren hezurra eta burua sartuko ditugu bertan, tipula eta perrexil sorta batekin. 20 minutu izango dugu egosten.

Orburuak

Orburuak egosten jarriko ditugu azala kendu gabe herdoildu ez daitezen. Egosi ondoren kanpoko azalak kenduko dizkiogu eta bihotzekin gordeko ditugu.

Legatza eta txirlak saltsa berdean

Legatzari solomoak aterako dizkiogu eta gorde egingo ditugu. Lapiko batean saltsa berdea egingo dugu; oliba olioa berotu eta baratxuriak eta kaiena piperra botako ditugu bertara irin pixka batekin. Arrain fumeta erabiliko dugu saltsa ondo ligatzeko. Perrexila botako dugu. Gorputza hartu duenean arrain solomoak sartuko ditugu eta 10-11minutu izango ditugu su baxuan. Legatza erdi eginda dagoenean txirlak botako ditugu lapikora.  Azkenik orburuak gehituko ditugu. 

Bukaera

Plater batean legatz solomoa eta saltsa berdea jarriko ditugu txirlekin lagunduta. Legatzaren kokotxa arrautzatik pasa eta zartagin batean frijituko ditugu solomoaren gainean apaingarri moduan jartzeko.