Prestaketa

Profiterol orea

Eltze batean ura, esnea, gatza, azukrea eta zatitxotan ebakitako gurina sutan jarri. Irakiten hasten denean, sutatik atera eta irin guztia kolpe batez gehitu. Ondo nahastu ore fin bat geratu arte eta berriro sutara hurbildu orea lehortu dadin.

Orea pixka bat hozten utzi eta arrautzak banan banan gehitzen joango gara, ondo nahasten goazen bitartean. Gozogintzako zorro batean sartu eta erretilu batean oreari bolatxo forma ematen joango gara. Labean sartu 180 ºC-tan 12-15 minutuz, labeari lurrina kendu eta beste 15 bat minutu edukiko ditugu opiltxoak labean, barrutik ondo lehortu daitezen.

Krema gozoa

Esne guztia aldez aurretik haziak ateratako banilla adarrarekin egosi. Esnea 5 minutu inguru utziko dugu infusioan. Lurrintzailea kendu. Bol batean almidoia esnearekin disolbatu, hagaxka baten laguntzaz. Orain gorringoak, arrautzak eta azukrea gehitu, eta ondo nahastu. Nahasketa hori esne beroaren gainean botako dugu, mugitzeari utzi gabe. Poliki-poliki krema irakin, zanpatu arte. Hagaxka baten laguntzaz, etengabe eragin. Iragazi ontzi egoki baten gainean, eta gorde, plastiko batekin tapatuta.

Arrautza-suspiloa

Zuringoa harrotzen hasi eta azukrea pixkanaka gehitzen joango gara. Tente dagoenean, azukre hautsa gehitu, ondo eragin eta krema gozoarekin nahastu.

Chiboust krema

Ontzi batean bi kremak elkartu eta gozogintzako zorroan sartuta, opiltxoak beteko ditugu.

Esne-gain harrotua

Esne-gaina azukrearekin eta banila haziekin ontzi batean sartu eta hagaxkarekin harrotu. Gozogintzako zorroan sartu.

Profiterolak itsasteko karamelua:

Azukrea mugitu gabe, zartagin batean karamelutzen jarriko dugu, opiltxoak itsasteko.

Oinarrirako hostorea

Hostorea luzatuta, behar dugun tamainan moztu, zulotxo batzuk egin, azukrea gainetik bota eta labean sartuko dugu 180 ºC-tan.

Bukaera

Opiltxoak kremarekin bete, karamelutik pasa eta hostorean itsasten joango gara, borobila bete arte. Erdian zentimetro bateko lodieran krema gozoa jarriko dugu eta honen gainean esne-gaina harrotua dena estaltzen. Karamelu hariekin apainduko dugu.