Gerediaga elkarteko Nerea Mujika izango da gaurko gonbidatua 'Gure Kasa'n

Durangoko Azokako ateak irekitzeko ordu gutxi falta direnean, gonbidatu berezi bat izango dute gaur 'Gure Kasa' saioan: Nerea Mujika. Durangoko Azoka antolatzen duen Gerediaga elkarteko presidentea da Nerea 2004tik, eta, horrez gain, Deustuko Unibertsitateko irakaslea ere bada. Azokaren inguruko sekretu eta bitxikerien inguruan hitz egingo dute saioan, eta aurten aurkituko ditugun berrikuntza eta sorpresei buruz ere galdetuko diote Telleria anaiek.

Marta Elvira eta Izaskun Moyano kolaboratzaileak izango dira Nerearekin batera platoan. Marta Durangora joan da, Nerea Mujika beste ikuspuntu batetik ezagutzeko asmoz, eta potilleoa atalean erakutsiko digu. Izaskunek, berriz, sorpresatxo bat prestatu dio Nereari; izan ere, Durangoko Azoka sortu zuten pertsonekin hitz egiteko aukera izan du.

'Gure Kasa' astelehenetik ostegunera izaten da ikusgai, ETB1en eta eitb.eus-en, 21:00etan.