Gure Zirkuko artistak, gaur gauean, 'Gure Kasa' saioan

Gure Zirkua euskal zirku ibiltariko bost artista izango dituzte gonbidatu gaur 'Gure Kasa'n: Iker Galartza, Unai Zabaleta, Koldo Arakistain, Iraitz Lizarraga eta Ekain Ibarguren. Iazko arrakastaren ostean, bigarren denboraldiari ekin diote, herriz herri. Ikuskizun berriaren nondik norakoez eta orain arteko esperientziaz mintzatuko dira.

Nahiara Gagok artxiboa astindu, eta gonbidatuen sekretuak azaleratuko ditu. Goranek, berriz, Gure Zirkura egindako bisitaren irudiak erakutsiko dizkigu. Bestalde, Asisko Urmeneta bere errotuladoreekin sartuko da platora, eta, begirada zorrotzarekin, zirkuko artisten karikaturarik xelebreenak egingo ditu.

Amaitzeko, Iban Garcia Donostiako uretan ibiliko da. Donostiako piratek abuztuko abordatzean egiten duten bezala, kaitik Kontxara arteko zeharkaldia egingo du, baina paipo batean.

'Gure Kasa' 21:10etik aurrera izaten da ikusgai, astelehenetik ostegunera, ETB1en eta eitb.eus-en.