Bixintxo Bilbao eta Peio Larralde, gaur, 'Gure Kasa'n

Trinketeko munduko txapelketa irabazi eta podiumean ikurrina atera zuelako zigortu zuten Bixintxo Bilbao eta haren bikotekide Peio Larralde hartuko dituzte gonbidatu gaur gauean 'Gure Kasa' saioan. Nahi gabe albiste bihurtu diren bi pilotariak beraien ibilbidea errepasatu, ikurrina ateratzeak sortu dizkien arazoak azaldu eta ondo pasatzera datoz gure saiora.

Nerea Aliasek ETBko artxiboa zabalduko du hainbat kiroletan ikurrina atera duten kirolariak eta polemikak gogoratzeko. Nahiara Gagoren jolasak banderekin eta himnoekin izango du zerikusia. Asisko Urmenetak eta bere errotuladoreek ere hitz egingo dute, Bixintxoren eta Peioren pasarteren bat jasoko baitu marrazkietan.

Iban Garcia youtuberrak beste challenge bat ekarriko digu. Bere amaren laguntzaz, 'Tiny challenge' edo esku txikien erronka egiten ahaleginduko da.

'Gure Kasa' saioa 21:30ean izango da ikusgai ETB1en eta eitb.eus-en.