'Macbeth'en bertsio berritzailea, gaur gauean, 'EiTB Kultura Transit' saioan

Arriagak estreinatu duen Macbeth lanaren bertsio berria, Jon Maya dantzari eta koreografoaren kuttunak eta Igor RG musikariaren abestiak izango dira 'EiTB Kultura Transit' saioaren gaurko gai nagusiak.

Bilboko Arriaga antzokiak Macbeth estreinatu du, Shakespeareren klasikoa ikus-entzunezkoak, musika eta agertoki gaineko aktoreen lana uztartzen dituen bertsio batean, Alex Gerediagaren zuzendaritzapean. Euskaraz eta gaztelaniaz egin dute egokitzapena, testuak dituen erronkei aurre egin eta istorioa kriminal-familia garaikide baten testuingurura ekarriz. Izan ere, duela lau mende idatzi zen Macbeth, baina botere goseak eta boterea lortzeko borrokak gaur egungo gaiak ere badira.

Jon Mayaren kuttunak

Euskal sorkuntza du gustuko Jon Maya Kukai dantza-taldeko zuzendariak. Horregatik atera ditu 'EiTB Kultura' saioko zakutik Kirmen Uriberen eta Uxue Alberdiren azken liburuak eta Juan Mari Beltranen Txalaparta diskoa.

Niessen kulturgunera (Errenteria) gonbidatu du EiTBko lantaldea, bertan baitu egoitza nagusia Kukaik. Han hitz egingo du hainbeste miresten duen Israel Galvan dantzariaz, eta Soinujolearen semea antzerkiaz.

Ibon RG musikaria

Ibon Rodriguez musikariak hogei urtetik gora daramatza Bizkaiko eszena independente eta esperimentalean parte hartzen; musikari gisa, besteen musika ekoizten, eta baita kontzertuak antolatzen ere. Instrumentuak bazterrean utzi eta bere ahotsean jarri du arreta atera berri duen azken lanean. A capella sortutako abestiek osatzen dute Hil zara disko bikoitza. Lehenengo diskoan, leku berezietan ahots hutsez grabatutako kantuak bildu ditu, eta bigarrenean, berriz, pianoz lagundutakoak. Diskoaren aurkezpen egunean bertan egin dute hitzordua Ibon RGrekin, Bilboko Xake tabernan, aurkezpenerako prest duen pianoaren ondoan.

'EiTB Kultura Transit' ostegun gauetan izaten da ikusgai ETB1en eta ETB2n, eta baita eitb.eus-en ere.