Masprezaren jokoak taldeen arteko indarrak desorekatuko ditu gaur gauean "El Conquis" saioan

Infernuko harresiaren aurka talka egin ostean, "El Conquistador del Caribe" saioaren 12. atalean lehiakide batek baino gehiagok egoera hobetzeko aukera izango du, baina txarrera egiteko aukera ere izango dute. Polemika sortu ohi duen proba klasiko bati egin beharko diote aurre astelehenean, masprezaren jokoari, hain zuzen ere.

Trebezia, estrategia eta oreka ezinbestekoak izango ditu jokoak. Talde bakoitzeko kide banak, Jartanek, Miriamek eta Fellinik, suharria erabili beharko dute. Tresna horren erabilera dela eta hasiko dira lehiakideen arteko lehen liskarrak; izan ere, guztiak ez dira trebatuta egongo.

Zuzia piztea lortzen dutenean (lortzen badute, behintzat), talde bakoitzak bere kaiukoa ur-azpitik atera beharko du eta bidean aurkituko dituzten hiru suontzietako lehenengoari sua eman. Jokoa zailtzen joango da suontziak pizteko arduradunak kaiukoaren punta estuan aurrera egin ahala. Beraz, oreka ezinbestekoa izango da jokoan, eta oreka-ezak zenbait lehiakide ernegatuko ditu. Hiru suontziak piztea lortzen dituen taldeak ikurrinerainoko bidea hartu ahalko du.

Proba latz honi aurre egiteko, fisikoki zein buruz indartsu egon beharko dira taldeak, eta ez da erraza izango, infernuko harresiaren jokoaren ondorioz hainbat lehiakide behea jota gelditu baitziren. Hasteko, Yocahu taldeak Irusta galdu zuen eta Seletak ez zuen lortu harresiaren beste aldera igarotzea, eta dagoeneko ez dago hain argi indartsuenak direnik. Beraz, jokoa irabaziz gero, adorea hartzeko eta hain beharrezkoa duten janaria irabazteko aukera izango dute.

Talde horia, bestalde, indartuta dago Zuruk eta Izetak dueluan lortutako nagusitasuna dela eta. Dena den, taldeko fakzioetako kideen artean mesfidantzak daude, baina beste garaipen bat lortzeak giroa hobetu lezake.

Azkenik, Corocoteek Marta taldean mantentzea lortu zuten Aini kapitainak harresian izugarrizko erakustaldia egin ostean. Hala ere, bilbotarra ez zen gustura gelditu, eta masprezaren jokoa aukera ona izan liteke abenturan aurrera egiteko adorea berreskuratzeko.

Taldeek gero eta beharrezkoagoak dituzte garaipenak eta, ondorioz, baliteke asteak eta jokoak aurrera egin ahala gero eta tentsio gehiago egotea. Polemika eta liskarra protagonistak izango al dira masprezaren jokoan? Ikusteko dago zer nolako jokoa izango den eta nortzuk joango diren duelura. Aste Santua hurbil dago, eta bati baino gehiagori penitentzia astelehenean egitea egokitu ahalko zaio.

"El Conquistador del Caribe" astelehenetan izaten da ikusgai, 22:15ean, ETB2n, eitb.eus-en eta "El Conquis"en aplikazioan. Gainera, atal guztiak ikus daitezke EITB Nahieranen, saioaren eta EITB Nahieran appetan eta EITB Mediaren gainerako plataforma digitaletan.