Álex Orbe ilustratzaileak 160.000 euroko zakua irabazi du "Atrápame Si Puedes" saioan

"Atrápame Si Puedes" lehiaketako zakua aste osoan zehar gertutik ukitu duen arren, Alex Orbe getxotarrak ostegun honetan, otsailak 18, lortu du azken minutuko bost galderei zuzen erantzutea. Ilustratzaileak 160.000 euro irabazi ditu, saioaren historiako zakurik handienetako bat.

Algortako ilustratzailea aste osoan zehar egon da sari nagusia irabazteko zorian. Asteartean, bere trebetasuna erakutsi zuen eta irabazteko galdera bakar bat utzi zuen erantzun gabe. Ostegun honetan, ordea, azken minutu hori osatzea lortu du La lengua de las mariposas filmaren musikaren egilea Amenabar izan zela asmatuz, eta amaierarako hiru segundo falta zirenean, Cachemireko artilea zein animaliatik datorren esanez. Azken segundoan, Patxi Alonsok emozio handiarekin iragarri du Alexen garaipena, 160.000 euroko zakuaren irabazle eginez.

Margolari bezala ibilbide luzea du Orbek, eta hainbat idazle ezagunekin lanak egin ditu, besteak beste, Unai Elorriagarekin. Alexek kultura frikiaren eta artearen jarraitzaile sutsuak diren guztien alde harrotasunez beteriko alegatua egin du.

Hostoil ekoiztetxeak egindako lehiaketak audientziaren fideltasuna lortu du egunez egun, eta azken urteetako daturik onenak eskuratu ditu denboraldi honetan. Bataz beste, % 11,7ko kuota eta 108.000 ikus-entzuleko audientzia metatua izan ditu Euskadin eta eragin eremuan. Lehiaketa egunero eskaintzen da "Teleberri" albistegiaren aurretik, eta bihartik aurrera 30.000 euroko zaku berri batekin hasiko da.