Telenatura Jaialdian saritutako erreportajea dakar 'Teknopolis'ek

Telenatura, Naturaren dibulgazioa eta zaintza bultzatzen dituen Nazioarteko Telebista Jaialdian, saria irabazi du 'Teknopolis' saioak Zelatan izeneko erreportajearekin eta horixe eskainiko du asteburu honetan.

Nafarroako Unibertsitateak eta Iruñeko Planetarioak elkarlanean antolatzen duten zine jaialdiaren 10. edizioak erreportaje onenaren alorrean nabarmendu du 'Teknopolis'ek egindako lan monografikoa. Bertan, lau animalia-espezieren jarraipena egin zuten: zetazeoak, sarrioak, sai arrea eta hartz arrea. Animaliak zaintzen eta ezagutzen diharduten ikerlariekin elkartu ziren, espezie horien ikerketa lekuan bertan nola egiten zuten ikusteko. Horretarako, Bermeoko uretan, Aralarren, Huescako Pirinioetan eta Somiedo natura-parkean, Asturiasen, izan ziren. Ildo narratibo ezin hobearengatik eta egindako esfortzu handiarengatik eman diete saria.

Bestelako edukiak ere izango dituzte aste honetako saioan. Honela, bada, KTEK tartean urpeko arrantzari buruz arituko dira Joseba Kerexetarekin. Mundu osoko itsasoetan urpeko arrantza egiten aritu da Kerejeta durangarra. Oxigeno-botilarik gabe urpean igeri egiten maisua da, Munduko txapelduna baita modalitate horretan. Nagore Rementeriarekin batera, kirol espezialitate honen berezitasunak erakutsiko ditu.

Amaitzeko, nitratoei buruzko erreportajea bat aurkeztuko ditu Oihana Jauregik. Azken urte hauetan gure hondartzetako urak berdez jantzita ikusi ditugu, alga-kantitatearen mailak nabarmen gora egin duelako. Eta algek kostako ingurumena kaltetzen dute. Adituen esanean, kutsadurak eragin du ugaritze hori, itsasoko uretan pilatu den nitrato eta fosforo ugariak. Nitratoen igoeraren arrazoietako batzuk dira, besteak beste, ongarri nitrogenodunen erabilera eta nekazaritza-ustiategietan animalien mindaz egiten den kudeaketa desegokia. Zenbait lekutan, ordea, hasi dira arazo horri irtenbideak bilatzen.

Oihana Jauregik aurkeztuta, 'Teknopolis'ek larunbatean du lehen emanaldia ETB-1en, 21:00etan. Igandean 11:25ean ETB-2n ikus daiteke eta 15:30ean ETB-1en. Azkenik, asteazkenean 23:15ean ematen da ETB-3n.