Esther kanporatu dute kakoen dueluan, baina burua gora esan du agur

"El Conquistador del Caribe" saioaren 18. atalaren immunitate jokoan Esther joan da etxera Virren aurkako buruz burukoan. Mikelek jolas bat balitz bezala irabazi du duelua, erakustaldia eginez, talde urdinak duelura bidali dituen bi emakumeak lehian utzita. Nafarrak izugarrizko ahalegina egin du, eta, duelua galduta zuela ematen zuenean, Vir gainditu du, madrildarra ahituta eta kakoari eusteko ere ia indarrik gabe baitzegoen. Estherrek eskuan zuen bigarren postua, baina azken jaurtiketan sokak eskutik ihes egin dio, eta berriz ere hasierara itzuli beharrak etxera bidali du.

Mikelek bezala, Virrek ere kanpamentura itzultzea lortu du, baina indarrak oso gutxituta ditu, dueluan egindako ahalegin handiaren ostean. Gainera, talde urdinaren egoera oso latza da, janaririk lortu gabe jarraitzen baitu.

Bestalde, kanpamentu aberatsean heroi berri bat daukate: Erro. Ahuntz bat ehizatu du nafarrak, eta taldeari inork espero ez zuen otordu ederra oparitu dio. Indarraz gain, kemena ere eman dio ahuntza ehizatu izanak talde gorriari; izan ere, erruletan saririk lortu ez dutenean lur jota gelditu dira. Urdinek immunitate jokoa oparitu diote gorriei, arauak urratu baitituzte. Manuren taldeak aise irabaz zezakeen jokoa, gorriak askoz ahulago baitzeuden, baina irabazteko irrikaren ondorioz, enborretik zintzilikatu dira bultza egiteko orduan. Azkenean, Julianen abisuei kasurik egin ez dietenez, deskalifikatu egin dituzte eta, ondorioz, kanpamentu oso txirora joan dira.

Porrotak min handia egin die urdinei; izan ere, garaipena lortzear zeudela ezer gabe gelditu dira, eta horrek lur jota utzi ditu.

Ez galdu "El Conquistador del Caribe", astelehenetan, 22:30 aldera, ETB2n eta eitb.eus-en. Gainera, saioaren atalak EiTB Nahieranen ikus daitezke.