'Koronabirusak inguratuta' erreportaje berezia, gaur gauean, ETB1en eta eitb.eus-en

Gaur gauean, Koronabirusak inguratuta erreportaje berezia eskainiko dute ETB1ek eta eitb.eus-ek, 22:30etik aurrera. Klaudio Landak gidatuta, hainbat adituri egindako elkarrizketak eta egunerokotasunean bizi ditugun aldaketen testigantzak bilduko ditu saioak.

Erreportajeak Euskal Herriko hainbat leku bisitatuko ditu, koronabirusaren inguruko errealitate ezberdinak ezagutzeko. Gaurkotasunari lotutako ikuspegi sozialetik aztertuko ditu koronabirusaren eraginak gizartearen alor ezberdinetan. Hasteko, euskal enpresen egoera ikusi, eta gaixoekin zein mediku eta epidemiologoekin arituko dira. Azken horiekin, agintarien gomendioak eta martxan jarri diren neurriak kontuan izatearen garrantziaz hitz egingo dute.

Saioan elkarrizketatuko dituzten adituen artean, Miren Basaras EHUko mikrobiologoa, Ana Iruretagoiena psikologoa, Javier Yaguas gerontologoa eta Fake Newseko Mikel Aristiren testigantzak jasoko dituzte.

Era berean, kalera aterako dira Euskal Herrian gertatzen dena bertatik bertara jasotzeko asmoarekin: salbuespenezko egoera hau nola bizi dugun aztertuko dute. Supermerkatura eta okindegi batera joango dira, eta, horrez gain, gure geografiako zenbait lekutan, adineko pertsonei laguntzeko martxan jarri diren ekintza boluntarioen lekuko izango dira. Etxean haur txikiak dituzten gurasoen egoeraren berri ere emango dute, eta koronabirusa duten gaixoekin hitz egingo dute Skype bidez.

Koronabirusak inguratuta erreportajea gaur izango da ikusgai, 22:30etik aurrera, ETB1en eta eitb.eus-en.