Ekainaren 26ko hauteskundeen jarraipena, EiTBn

EiTB ren irratiak, telebistak eta webguneak ekainaren 26ko hauteskunde kanpaina eta hauteskunde gauari jarraipena egingo diete ekainaren 10ean hasita. Hartara, ETB1 eta ETB2 eta Euskadi Irratia, Radio Euskadi eta Radio Vitoria buru-belarri arituko dira kanpaina osoan eta baita hauteskunde egunean bertan ere. Eguneroko informazioa albistegietako saio berezietan emango da, eta, gainera, elkarrizketak eta eztabaidak eta doako iragarkiak egongo dira. Hauteskunde gauean, berriz, saio bereziak, inkestak, botoen kalkuluak eta behin betiko emaitzak. Horrez gain, EiTBk webgune berezia izango du Interneten, eduki eta jakingarri guztiekin.

Eguneroko albistegietan jarraipena

Aurreko hauteskundeetan bezala, EiTBk tarte bereziak eskaintzeko asmoa du oraingoan ere, bai telebistan, ETB1en eta ETB2n, bai irratietan, Radio Euskadin, Euskadi Irratian eta Radio Vitorian, kanpaina ofizialak dirauen denbora guztian eguneroko informazio saioetan emateko horren berri.

Hauteskundeei buruzko saioetan, informazio-gune nagusiei buruzko kronika ere egingo da, hainbat tokitatik: Madril, Katalunia eta abar.

Elkarrizketak

EiTBko albiste zerbitzuek euskal gizarte osoari alderdi bakoitzaren programan jasota dauden punturik aipagarrienei buruzko informazioa ematea izango dute helburu. Ahalik eta ikuspegi zabalena emateko asmoz, hauteskundeetara aurkeztuko diren alderdi eta koalizioen ordezkariei eginiko elkarrizketak eskainiko dituzte.

ETB1en, 'Egun On Euskadi' goizeko albistegian emango dituzte elkarrizketak, Estepan Aldamiz-Etxebarriaren eskutik, eta ETB2n, 'En Jake' saioaren barruan, Xabier Lapitzekin. Irratietan, berriz, astelehenetik ostiralera, Euskadi Irratian, 'Faktoria'n, Maite Artolarekin; Radio Euskadin, 'Boulevard' irratsaioan, Dani Alvarezekin, eta Radio Vitorian, 'Araba Gaur' irratsaioan, Maritxu Diezekin.

Eztabaida bana hedabide bakoitzean

Ikusleei alderdi politikoek hauteskundeetarako prestatu dituzten programen eta proposamenen zuzeneko kontrastea eskaintzeko helburuz, debate bana egingo da hedabide bakoitzean.

ETB1en hauteskunde debatea ekainaren 21ean eskainiko da Maddalen Iriartek gidatuta. ETB2n, berriz, Aintzane Bolinagarekin, ekainaren 23an izango da.

Era berean, Radio Euskadin 'Boulevard' saioan izango da debatea ekainaren 16an, 09:00etan, eta Dani Alvarezek gidatuko du; Euskadi Irratian, ekainaren 17an, 'Faktoria' saioan, 09:00etan, Maite Artolak gidatuta, eta Radio Vitorian, 'Araba Gaur' albistegian, ekainaren 16an, 12:00etan, Edurne Trascastrorekin.

Hauteskunde gaua

Ekainaren 26ko hauteskunde gauean, EiTBk saio bereziak emango ditu taldeko hedabide guztietan. Euskal Telebistak saio bana eskainiko du ETB1en eta ETB2n, 20:00ak baino lehen hasita, eta hauteskundeetako informazioa eta gainerako albistegi eta kirol saioetakoa tartekatuko dute. Euskadi Irratiak eta Radio Euskadik 19:45ean hasiko dute hauteskunde gaueko saio berezia.

Euskal Telebistan zein irratietan, alderdi politikoen iritziak jasoko dira, lehen egun horretan egin eta aireratu diren inkesten emaitzei eta hauteskunde eguneko emaitzei buruz, horiek ezagutu ahala. Zuzeneko harremana izateko bideak jarriko dira alderdi politiko nagusien egoitzekin eta datuak biltzeko zentro nagusiarekin.

EiTB iritzi-galdeketa bat diseinatzen ari da, FORTArekin elkarlanean, hauteskunde gau horretan izango diren emaitzen aurreikuspena egin ahal izateko. 20:00etan aireratuko dituzte galdeketaren emaitzak.

Webgune berezia eitb.eus-en

Webgune berezia izango du eitb.eus-ek, albisteen jarraipen estua eginez. Egunero, albisteak, bideoak eta EiTB Taldean (telebistan zein irratian) egiten diren elkarrizketak izango dira ikusgai. Gainera, inkesten emaitzak, infografiak eta aurreko hauteskundeetako emaitzak jarriko dituzte eskura.

Sare sozialetan, Twitterren gehienbat, politikariek zer dioten ere jasoko dute, eta hauteskunde egunean programak zuzenean emango dituzte eta emaitza guztiak eskainiko dituzte horiek zabaldu bezain pronto.

Horrez gain, mugikorren eta ordenagailuen bidez ere eskuratu ahalko dira hauteskunde kanpainako bideoak, audioak eta elkarrizketak. Alderdi bakoitzak leku berezia izango du, eta horien bideoak ikusi ahalko dira bertan. Webgunearen bidez ere jarraitu ahalko dira eztabaidak, eta ondoren 'EiTB Nahieran' zerbitzuan egongo dira ikusgai.

Amaitzeko, ekainaren 26an, jarraipen berezia egingo zaio hauteskunde gauari. Hauteskunde barruti eta herriz herriko emaitza guztiak eguneratuko dira une oro. Ordenagailu eta bestelako gailu mugikorretatik kontsultatu ahalko dira.