Chill Mafiaren "Agur eta Ohore" kontzertua zuzenean emango dute PRIMERAN eta GUAU plataformek

Chill Mafiak azken kontzertua emango du ostiral honetan BEC!-en, eta EITBren PRIMERAN eta GUAU plataformek zuzenean emango dute. Egun horretan bukatuko dute agur bira, hamar orduko jai izugarri batekin, eta "Agur eta Ohore" emanaldia ikusteko aukera egongo da, 23:00etatik aurrera, streaming bitartez. Hainbat artistarekin batera arituko dira, tartean, Nerve Agent, Hofe x 4:40, Euskoprincess, Bengo, La Txama, Mirua eta Arepas.

Produktoreak, abeslariak, DJk, diseinatzaileak eta graffitigileak… Duela hiru bat urte ezagutu genuen Iruñerriko koletibo hau, Xabier Leteren "Gazte arruntaren koplak" mitikoaren bertsio iraultzailea egin zuten eta. Ibilbide labur baina oparoan, beren ekarpena deigarria izan da euskal musikaren eszena garaikidean. Joan den irailean iragarri zuten agurra, Gaztearen "Dida!" saioan, eta ostiral honetan egingo dute azken zuzenekoa. PRIMERAN eta GUAU doako plataformetan jarraitzeko aukera izango dugu.