"Dinero a Saco", Klaudio Landak aurkeztutako 'game-show' berria, astelehenetik ostiralera ETB2n

"Dinero a Saco" game-show dibertigarri eta zirraragarri berria gidatuko du Klaudio Landak arratsaldero ETB2n eta eitb.eus-en. K 2000k (The Mediapro Studiok) ekoitzita, lehiakideek galderei erantzuteko duten zorroztasun mentala erakutsi beharko dute. Izan ere, galdera horien erantzunak zinta garraiatzaile batetik pasatzen diren diru-poltsetan egongo dira, eta azkar pentsatu beharko dute erantzun zuzenak dituzten poltsak aukeratzeko. Asmatuz gero, poltsako dirua irabazten dute; baina okerrekoa aukeratuz gero, dena gal dezakete. Astero 20.000 euro jarriko dituzte jokoan.

Klaudio Landa

Quiz-show berri honek hiru fase izango ditu:

-Aurrez aurrekoa: Sei lehiakide arituko dira bi parte-hartzaileko hiru norgehiagokatan, eta dirua banaka pilatuko da.

-Konfrontazio hirukoitza: Aurrez aurreko faseko kanporaketa bakoitzeko hiru irabazleak elkarren artean lehiatuko dira, ordura arte pilatutako kopuruei eutsiz. Diru gehien pilatzen duen lehiakidea finalera pasako da.

-Finala: Lau galdera izango ditu, bakoitza bi poltsarekin. Erantzun zuzen bakoitzak lehiakideak metatutako sariaren ehuneko bat gehituko du. Finalistak edozein unetan erabaki ahal izango du bi poltsak pasatzen uztea, horrela lehiaketa amaituz eta ordura arte irabazitako diruari eutsiz.

Umorea eta giro ona ez dira faltako lehiaketa berri honetan, eta intuizioa eta azkartasuna funtsezkoak izango dira bertan. Klaudio Landak lehiakideekin izango duen harreman hurbilarekin batera, galderek kultura orokorraren eta eguneroko gaien inguruko ezagutzaren oreka dibertigarria ekarriko dute.

"Dinero a Saco" saio berria, Klaudio Landak aurkeztuta, astelehenetik ostiralera izango dugu ikusgai, 17:45ean, ETB2n eta eitb.eus-en.