Beldurrezko Zinemaren Astea kalera bueltatu da

Donostiako Fantasiazko eta Beldurrezko Zinemaren 21. Astea kalera bueltatuko da, 20.ean izandako aurrekontu murrizketak direla eta, aretoetan izan baitzen bakarrik. Urriaren 30etik azaroaren 5era izango da.

Jose Luis Rebordinos Zinema Astearen zuzendariak eta Denis Itxaso Kultura eta Gazteria zinegotziak jaialdiaren edukiak aurkeztu dituzte, eta munduan genero horretan egin diren pelikula garrantzitsuenak proiektatuko dira, Rubber frantziarra ezik.

Rebordinos eta Itxasok filmen selekzioaren maila goraipatu dute, pelikula "heterodoxoak" izango direla aurreratu dute. Donostiako kaleetan zehar hainbat ekitaldi izango omen dira. Hori lortzeko, Astearen antolatzaileek ekitaldi tradizionalak berreskuratuko dituzte. Iazko edizioan, eta murrizketa ekonomikoak direla medio, hasierako kalejira kendu zuten, baina aurten Carros de Foc taldeak egingo du.

Zinemagintzari dagokionean, Rebordinos (bere azken edizioa izango da Beldurrezko Astean, izan ere, urtarrilaren 1ean Donostiako Zinemaldiaren zuzendaritza lana hartuko du) oso pozik azaldu da, Gipuzkoako hiriburura generoaren titulu garrantzitsuenak ekartzeko lanak bere fruituak eman baititu. "Rare Exports" filmak inauguratuko du (Sitgesen film onenari eta zuzendari onenari saria eskuratu du), Jalmari Helanderrena. Duela bost urte film labur bat estreinatu zuen, Papa Noelen figuraren inguruan hausnartuz.

21 pelikula izango dira lehiaketan, batzuk umorean oinarritzen dira eta besteak, muturreko egoerak dituzte aztergai, "A serbian film", kasu. Programazioaren beste lan garrantzitsuetako bat Aleister Crowleyren figurari eskainitako "La Bestia 666", poeta, mago, satanista, espia eta abenturazalea.