kultura
Gasteiz
Gasteizko Amarika Aretoak kulturgunea izaten jarraituko du
N. V. | EITB Media
Aretoa berrikuntza zentro bat hartzeko espazio egokia izan zitekeela pentsatu ondoren, atzera egin du Aldundiak eta kulturgune izaerari eutsiko dio aretoak, "biziberrituta".
-
Amarika aretoa
Arabako Foru Aldundiak atzera egin du, eta, "kultura sektoreari entzun ondoren", erabaki du Amarika aretoa ez dela berrikuntza zentro bihurtuko, horretarako toki egokia iruditzen bazitzaion ere, eta espazioak kulturgunea izaten jarraituko du, horrenbestez.
"Kultura Sailean beti entzun diogu modu aktiboan eta etengabe Arabako kultura sektoreari. Sarritan bildu gara kulturarekin lotutako artistekin eta profesionalekin, gure nahia Arabako kultura arloko beharrei erantzutea baita. Entzute horretatik sortu zen Kultura Plana, eta, entzute aktibo horren ondorioz, beharrezkotzat jotzen da Amarika Aretoak kulturgunea izaten jarraitzea", baieztatu du Ana del Val Arabako Kultura Saileko foru diputatuak.
Aretoaren proiektua "hobetu" egingo dutela erantsi du Del Valek: "Aretorako alternatiba bat edo hura biziberritzeko proiektu bat behar dugu oraindik ere, eta Kultura Planean helduko diogu gai horri".
