kultura
19. edizioa
Getxoko Komiki Azoka ohikora itzuliko da asteburuan
N. V. | EITB MEDIA
Iazko salbuespenaren ondoren, Bizkaiko udalerriko azokak ohiko kokalekua berreskuratuko du, eta 40 saltoki izango dira produktuak aurkezten. Kim eta Ernesto Murillo 'Simonides' omenduko dituzte.
-
Getxoko 2018ko Komiki Azoka
Getxoko Komiki Azokaren 19. edizioa ospatuko da ostiral honetatik, urriak 1, igandera, eta 40 saltoki izango dira Areetako Geltokia plazan, oraingoan karparik gabe. Kim eta Simonides egileak omenduko dituzte, eta profesionalentzako topaketak eta tailerrak egongo dira lehen aldiz.
Iaz, ez zen Komiki Azoka egin, eta horren ordez, komiki jardunaldiak antolatu ziren, osasun egoera zela eta, baina aurten bere ohiko kokapenera itzuliko da, Areetako Geltokia plazara. Hitzaldiak, tailerrak, mahai inguruak, argitaletxeen aurkezpenak eta erakusketa, berriz, Romo Kultur Etxean izango dira.
Arlo artistikoari dagokionez, ohikoa denez, egile ezagunak izango dira Getxon, hitzaldietan, aurkezpenetan eta sinaduren txandetan. Horien artean, Borja Crespo programaren koordinatzaileak Kim artista katalana nabarmendu du. 'El Jueves' aldizkari satirikoaren orrietan agertzen den Martinez el Facha pertsonaiagatik da ezaguna, eta 2015ean Komiki Sari Nazionala irabazi zuen, Antonio Altarribarekin batera, 'El arte de volar' eleberri grafikoari esker.
Kim ez ezik, Ernesto Murillo 'Simonides' ere omenduko dute aurtengo edizioan. Euskal komikigintzaren erreferentea da, batez ere 'TMEO!' argitalpenean egindako lanagatik.
